спор (прид.)
Тешкиот и спор ритам на водењето љубов што му го наметна таа како сосема да му го затвори грлото.
„На пат кон Дамаск“
од Елизабета Баковска
(2006)
И заплива полека во тоа, а неговата тврда корупка, што ја имаше и тој, како и секоја семенка, околу својата свест, почна сега да се отвора со една речиси неосетна спорост, низ која сепак имаше токму онолку, колку што му беше потребно простор за да се подаде и да поникне.
„Белата долина“
од Симон Дракул
(1962)
Неговиот поглед беше многу спор за да го дофати барем кај една од нив тој миг.
„Белата долина“
од Симон Дракул
(1962)
Јас веслав споро. Таа нешто изгледа ми зборуваше, но јас не слушав.
„Братот“
од Димитар Башевски
(2007)
Одаите се колнат во клучарот стар и спор Немаат тие доверба во оние однадвор!
„Забранета книга“
од Веле Смилевски
(2011)
Во неговите неми инструкции имаше некој толку силен авторитет што дојденецот воопшто не се замисли, туку по некој послушен автоматизам, со тешки и спори движења почна да го симнува ременот.
„На пат кон Дамаск“
од Елизабета Баковска
(2006)
Трчаат луѓето од едно место до друго, од еден крај до друг, трчаат и внимаваат да не ги видат, да не ги дефинираат како идиоти, како типови кои споро размислуваат, уште поспоро реагираат оти коефициентот на интелигенција им е олеле мајко.
„Календар за годините што поминале“
од Трајче Кацаров
(2012)
Тоа надоаѓаше во неговото тело во некакви спори налети, од кои се чинеше како по сета кожа да му избиваат некакви црвени безболни пликови, беше свесен дека тоа мускулите во него умираат.
„Белата долина“
од Симон Дракул
(1962)
Го освојуваше секое од нив споро и мачно, а кога ќе го оставаше зад себе, имаше во градите толку здив и толку радост за да продолжи да му се приближува на следното.
„Белата долина“
од Симон Дракул
(1962)
Тие отпрвин удираа подалеку, а после се доближуваа кон него, ужасно и неиздржливо спори.
„Белата долина“
од Симон Дракул
(1962)
Од тоа руно трпеливо и споро се ронеше тој снег, паѓаше бесшумно и кружејќи, имаше чудно мек допир во својата залебденост, носеше блага вртоглавица во погледот, со онаа чудна развиорена спорост на своите роеви-роеви снежинки, што надоаѓаа повеќе од сите страни отколку озгора, густо и со некаква волшебност исполнувајќи го просторот меѓу небото и земјата.
„Белата долина“
од Симон Дракул
(1962)
Изненаден од новата појава, Јехуда се сврте и го виде возбуденто лице на таткото на Алегра, се подврати ја извади капата збунето поздравувајќи со мал наклон и кревање на капата, а потем забрза да ја стигне девојката, која стеснета од возбуда, споро чекорејќи пред него во улицата, гледаше напред за да ги избегне љубопитните погледи на стариците од зад пенџерите.
„Светилка за Ханука“
од Томислав Османли
(2008)
Се раѓаше полека неговиот лик, се оформуваше споро - како пиле во јајце.
„Злодобро“
од Јован Стрезовски
(1990)
Но, имаше време, а имаше и место за да го стори тоа толку споро, и неговото движење да не се разликува ни малку по својата незабележливост од она споро движење на сенката околу дрвото во сончев ден. Така ги очекуваше.
„Белата долина“
од Симон Дракул
(1962)
Беше сместена во лето, во некоја мароканска жега. Сѐ одеше споро и лепливо.
„Братот“
од Димитар Башевски
(2007)
Ја крева споро раката и отстранува по некоја залепена сламка. „Не менува“, одговара Вангел.
„Бунар“
од Димитар Башевски
(2001)
Тромаво и споро ја подигна раката за да ги повика од зад себе и само со два-три збора се разбраа како ќе се поделат.
„На пат кон Дамаск“
од Елизабета Баковска
(2006)
Таа вечер со Симона гледавме на телевизорот една спора филмска приказна.
„Братот“
од Димитар Башевски
(2007)
Петре се спика под тезгето и го повлече манастирскиот измеќар кој беше и помлад од него, зашто умот, кој најчесто споро му работеше, сега му прати брз абер: јаничарите!
„Вежби за Ибн Пајко“
од Оливера Николова
(2007)
А киевјаните се мирни, спори и без никаква американизација.
„МАРГИНА бр. 29-31“
(1996)
